سه‌باره‌ت به کاریکاتۆری هه‌ڵبژاردنی ئه‌نجومه‌نی پارێزگاکان !
سه‌ره‌نجام رۆژی شه‌ممه 31/1/2009 هه‌ڵبژاردنی ئه‌نجومه‌نی پارێزگاکان له عێراقدا ئه‌نجام درا . به پێ ی راپۆرته هه‌واڵیه‌کان ئه‌م هه‌ڵبژاردنه له ناو باردۆخێکی که‌مێک ئارامدا و به‌بێ ڕووودانی کاری تیرۆریستی ئه‌وتۆ ئه‌نجام درا .
حیزبی ئێمه پێش ئێستا له ساڵی 2005 دا هه‌لبژاردنی "په‌رله‌مان" ی مه‌حکوم کرد . ئه‌و هه‌ڵبژاردنه له کاتێکا بوو ململانێ تیرۆریستانه‌که‌ی نێوان ئه‌مه‌ریکا و دۆسته‌کانی له به‌رانبه‌ر لایه‌نه‌کانی ئیسلامی سیاسی له ئه‌وپه‌ری توند بوونه‌وه‌دا بوو . وه له کاتێکا بوو بوردومان و ته‌قینه‌وه‌ی ئۆتۆمبیلی مین رێژکراو و ڕۆکێت باران و تیرۆر کردن و راگرتنی لووله‌ی و ده‌بابه‌کان له به‌رانبه‌ر کۆمه‌ڵگادا و فرۆکه جه‌نگیه‌کانی ئه‌مه‌ریکا له ئارادا بوون ، سه‌ره‌تایی ترین پێوانه‌و بنه‌مای هه‌لبژاردنێکی مه‌ده‌نیانه له ئارادا نه‌بوو. حیزبمان ئه‌م هه‌ڵبژاردنه‌ی به دژی ئیراده‌ی خه‌لک وه‌سف کرد و ئامانجی ئه‌و هه‌ڵبژاردنه شه‌رعیه‌ت دان بوو به هێزه‌کانی سیناریۆی ره‌ش جا چ لایه‌نه‌کانی دینی بن یا قه‌ومی که هێزه داگیرکه‌ره‌کانی ئه‌مه‌ریکاو هاوپه‌یمانه‌کانی له پشتیان بوون . له ساڵه‌کانی دوای هه‌ڵبژاردن ئه‌و راستیه ده‌رکه‌وت که چۆن ئیراده‌ی ئه‌و خه‌ڵکه تینووه‌ی به ئاسایش و ئارامی وئازادی و یه‌کسانییه زه‌وت کرا .
ئه‌مرۆ له پاش 4سال تێپه‌ر بوون به سه‌ر هه‌ڵبژاردنه‌که‌ی 2005 دا هه‌ڵبژاردنێکی تر ده‌کرێ به ناوی هه‌ڵبژرادنی ئه‌نجومه‌نی پاریزگاکان. له لایه‌ن ئه‌و ده‌سه‌ڵاته کۆنه‌په‌رسته‌وه تا به ته‌واوی خه‌ڵکی بێ ئومێد بکه‌ن له رزگار بوون له‌ده‌ست باردۆخی ناهه‌مواریان که ئه‌م هێزانه و به پشتیوانی ئه‌مه‌ریکا پێکیان هێناوه .
حیزبمان ، حیزبی کۆمۆنیستی کرێکاری چه‌پی عێراق رای ده‌گه‌یه‌نێ ئه‌م هه‌ڵبژاردنی ئه‌نجومه‌نی پارێزگاکان که له 31/1/2009دا ئه‌نجام درا وه زۆر ده‌هۆڵی بۆ لێ ئه‌درا هیچ نه‌بوو جگه له کاریکاتۆرێک له لایه‌ن ئه‌م ده‌سه‌ڵاته‌وه که ئه‌مه‌ریکا و جمهوری ئیسلامی ئێرانی له پشت بوو ، وه ئامانجیشی جارێکی تر راکێشانی ده‌نگی ملیونه‌ها که‌س بوو بۆ بۆ پته‌و کردنی جێگاو رێگای ئه‌م ده‌سه‌لاته و درێژه‌دان به سیاسه‌ته کاره‌ساتباره‌کانی . پروپاگه‌نده‌کانی ده‌سه‌ڵاتی به کرێ گیراوی مالیکی و حکومه‌ته ئیسلامی و قه‌ومیه دواکه‌وتوه‌که‌ی ده‌یکا ،گوایا ئه‌م هه‌ڵبژاردنه ده‌توانێ یارمه‌تی ده‌ر بێ بۆ دامه‌زراندنی " ده‌وڵه‌ت " و "یاسا " و" داموده‌زگاکان ' پروپاگه‌نده‌یه‌کی پووچه ئامانجی ئه‌و خۆڵ کردنه ناو چاوی خه‌ڵکه‌وه‌یه ئه‌و ده‌یه‌وێ به‌م شیعاره "مه‌رکه‌زیانه" بچێته مه‌یدانی جه‌نگه‌وه له گه‌ڵ ره‌قیبه‌کانی خۆی له ملیشیاکانی تر .مالیکی به هیچ جۆرێک ناتوانێ ده‌وری رابه‌رێکی ده‌وڵه‌تی ببینێ له کاتێکا سیاسه‌ته‌کانی و ره‌فتاره‌کانی دینی وتایفی بێ .هه‌مان ئه‌م سیاسه‌تانه‌ی مالیکی هیچی که‌م نیه له سیاسه‌ته‌کانی حیزبی ده‌عوه و هاوپه‌یمانه‌کانی پێشووی وه‌ک ملیشیاکانی به‌در و پوخڵاوه‌ته‌کانی سوپای مه‌هدی و مافیاکانی حیزبی ئیسلامی و قاعیده .جاده‌کان و قوتبخانه‌کان کراون به سه‌نگه‌ر بۆ هه‌لڕشتنی رق و کینه‌ی دینی و تایفی و قه‌ومی شۆفینی وه رشتنی خوێنی خه‌لکی بێ گوناه و روخانی خانه‌و لانه‌یان و یا کردنیان به جێگای ئه‌شکنجه و له ناوبردنی ره‌قیبه‌کانی یه‌کتر و دیواری سه‌ر جاده‌کان کراون به جێگای پروپاگه‌نده بۆ باڵه‌کانی ئیسلامی سیاسی وه هه‌ره‌شه‌کردنی له ژنان و له کوشتنیان و داماڵینی ماهیه‌تی ئینسانیان . مالیکی ته‌نانه‌ت نا‌توانی وێنه‌کانی خۆی له شاره‌کانی باشوری عێراق بخاته سه‌ر دیواره‌کان له ترسی کاندیده‌کانی تری ئیسلامی سیاسی ره‌قیبه‌کانی خۆی که ته‌نها ئه‌مانه ده‌یانتوانی ته‌رویج به ره‌وته‌کانی خۆیان بده‌ن له‌و ناوچه‌دا ! ئیتر مالیکی و ده‌وروبه‌ره‌که‌ی له کوێدا ئه‌توانن بلێن که ئه‌وانن پیاوانی " ده‌وڵه‌تی " و "یاسا" و "داموده‌زگاکان " له کاتیکا ئه‌مانیش باڵێکی سیاسی و خاوه‌ن ره‌فتاری ملیشیایی دینی و تایفی بن ؟!
ئه‌نجامه‌کانی هه‌لبژاردنی ئه‌نجومه‌نه‌ی پارێزگاکان به ته‌واوی له دژی به‌رژوه‌ندیه‌کانی خه‌ڵکه و هه‌روه‌ک هه‌لبژاردنه‌که‌ی رابردوو ئه‌میش ده‌بێته هۆی قوڵتر کردنه‌وه‌ی مه‌ینه‌تیه‌کانی کۆمه‌ڵگا له هه‌موو لایه‌که‌وه ؛ کوێره‌وه‌ریه‌کان زیاتر ده‌کا زۆربه‌ی خه‌لک زیاتر بێ ماف ده‌کرێن، ته‌قینه‌وه‌و تیرۆرو کوشتار زیاتر ده‌بێ، قه‌ڵشت و ناکۆکیه دینی و تایفییه‌کان زیاتر ده‌بن ،بێحورمه‌تی زیاتر ده‌کرێ به ژنان به هۆی داسه‌پاندنی یاساکانی شه‌ریعه‌ی ئیسلامیه‌وه ،عه‌شیره‌ت گه‌ری و دواکه‌وتووی په‌ره پێ ده‌دا و بنه‌ماکانی کۆمه‌ڵگای مه‌ده‌نی زیاتر تێک ده‌دا ،دواتر که کۆتایی نایه‌ت ، زیاد بوونی برسیه‌تی وهه‌ژاری و بێ به‌شی و ناخۆشگوزه‌رانی وهێڕش بۆ سه‌ر ده‌سکه‌وته‌کانی خه‌ڵکه . ئه‌و لایه‌نانه‌ی براوه‌ی هه‌ڵبژاردنن هێچ وه‌ڵامێکیان نیه بۆ داخوازیه‌کانی خه‌لکی عێراق . جگه ئه‌نجامه‌کانیشی ئه‌م هه‌لبژاردنه بۆ خۆی ده‌بێته هۆی ئه‌وه‌ی لایه‌نه ئیسلامیه تایفیه‌‌کان و قه‌ومیه‌کان به هێز بن ئه‌مه‌ش ده‌بێته هۆی په‌ره‌دان به دواکه‌وتوویی له باری سیاسی و کۆمه‌ڵایه‌تیه‌وه ئه‌و کاته کۆمه‌لگا له سه‌ر بنه‌ما دواکه‌وتوو وه نائینسانیه‌کان ده‌چێ به رێوه . ئیراده‌ی خه‌لک نامێنێ و چاره‌نوسی کۆمه‌ڵگا نادیار و ناجێگیر ده‌بێ به هۆی ئه‌وه‌ی ئه‌م هێزانه به کۆمه‌کی ئه‌مه‌ریکا چاره‌نوسی خه‌لک به ده‌سته‌وه ده‌گرن و هه‌موو کارێک ده‌که‌ن بۆ ده‌سه‌ڵاته‌که‌یان و هه‌ر گۆرانێکاریه‌ک ده‌یکه‌ن له پێناو به‌رژوه‌ندی خۆیاندا ده‌بێ .
رێگا چاره‌ی ئه‌م باردۆخه‌ی ئێستای عێراق رێگای ئه‌نجامدانی هه‌ڵبژاردنێک نیه له بارو دۆخێکدا که باڵ ولایه‌نه دینی و تایفی و قه‌ومی یه‌کان هه‌ژموونی خۆیان داسه‌پاندبێ ، به‌ڵکو له ڕێگای خه‌باتێکه‌وه‌یه که بتوانێ زۆرترین هێزی ئازادیخواز و یه‌کسانیخواز وعه‌لمانی وسۆشیالیستی و چه‌پ له کۆمه‌ڵگادا هه‌لخرێنێ بۆ دوورخستنه‌وه‌ی ئه‌م باڵ و‌لایه‌نانه وه نه‌‌هێشتنی ده‌سه‌لاتی ئه‌مانه به سه‌ر ژیان و چاره‌نوسی ملیۆنه‌ها که‌س له خه‌لكی عێراق که ئاره‌زوویانه بگه‌ن به ئازادی و یه‌کسانی و عه‌لمانیه‌ت و مه‌ده‌نیه‌ت . دیاره به‌دی هاتنی ئه‌م ئاره‌زووه‌ی خه‌لکی عێراق له گره‌وی چوونه ده‌ره‌وه‌ی هێزه‌کانی ئه‌مه‌ریکا له عیراق و چه‌ک کردنی ملیشیا کۆنه‌په‌رسته‌کان و مافیا چه‌کداره‌کانیان و ئاوه‌ڵا کردنی هه‌لومه‌رجێک ده‌بێ که خه‌ڵک بتوانن خۆیان چاره‌نوسی سیاسی خۆیان دیاری بکه‌ن به‌بێ ترس و تۆقاندن و سووکایه‌تی پێ کردن .
حیزبی ئێمه‌له هه‌و‌ڵی ریسوا کردنی هه‌موو ئه‌و هه‌وڵانه ده‌بێ که لایه‌نه ئیسلامی و قه‌ومیه‌کان و هاوپه‌یامانه‌کانیان له ده‌وله‌تی ئه‌مه‌ریکا و رژێمی ئیسلامی ترۆریستی ده‌سه‌ڵاتدار له ئیران ده‌یده‌ن بۆ به‌کارهێنانی هه‌لبژاردن و به‌کارهینانی رای خه‌ڵک بۆ به‌رژوه‌ندیه‌کانیان ، وه حیزبمان تێ ده‌کۆشی بۆ کۆکردنه‌وه‌ی جه‌ماوه‌ر له ده‌وری خواستی حیزب که کردنه ده‌ره‌وه‌ی ده‌ست به جێ ی هێزه داگیره‌کانی ئه‌مه‌ریکایه له لایه‌ک له لایه‌کی تره‌وه چه‌ک کردنی سه‌رجه‌م میلیشیا چه‌کداره ئیسلامی قه‌ومیه‌کانه له عێراقدا . ئێمه لێره‌وه بانگه‌وازی خه‌لكی ئازادیخواز و یه‌کسانیخواز و سکۆلاریست وسۆشیالیست و لایه‌نه کرێکاری و ئینسانیه‌کان ده‌که‌ین له سه‌راسه‌ری دونیاو عێراقدا، له ده‌وری داواکانی ئێمه‌دا کۆببنه‌وه بۆ ئه‌وه‌ی ببین به‌و هێزه ئینسانیه به توانایه‌ی که بتوانین گره‌وتی رێگاکان بگۆرین و ئه‌م بارودۆخه له به‌رژوه‌ندی خه‌لکدا کۆتایی پێ بێ .
حیزبی کۆمۆنیستی کرێکاری چه‌پی عێراق
1/2/2009