ئه‌مه هه‌ڵبژاردنی ئێمه‌ی خه‌ڵکی کوردستان نیه !
سه‌ردار عه‌بدوڵا حه‌مه
بزووتنه‌وه‌ی ناڕه‌زایه‌تی له دژی ده‌سه‌ڵاتدارانی کوردستان و به تایبه‌ت یه‌کێتی
و پارتی بزووتنه‌وه‌یه‌کی به‌رفراوانه‌و زۆر ده‌مێکه به‌ڕێ که‌وتووه . ئه‌م
بزووتنته‌وه‌یه زۆر له‌و که‌س و گروپ وحیزبانه‌ی که ئه‌مڕۆ له پرۆسه‌ی
هه‌ڵبژاردنه‌کاندا خۆیان کردۆته کوێخا و ده‌م راستی
ئه‌و ،له پێشتره و رادیکاڵتره ،
ئه‌م که‌س
و گروپ و حیزبانه له هه‌مان سه‌نگه‌ری به‌رانبه‌ر به خه‌ڵکدا راوه‌ستاون
ده‌یانه‌وێ ئاڵای سپی خۆ به‌ده‌سته‌وه
دان له به‌رانبه‌ر هێرشی په‌یتا و په‌یتاو توندی ئه‌م بزووتنه‌وه‌دا
نیشان بده‌ن ، وه فریوکارانه ده‌ڵین : له گه‌ڵ ئێوه‌ی خه‌ڵکی
سته‌مدیده‌ین ده‌یانه‌وێ بڵین "گۆران" و "
ڕیفۆرم وچاکسازی" ده‌که‌ین "خزمه‌تتان"
ده‌که‌ین ئازادی وعه‌داله‌تتان بۆ
ده‌هێنین وه ده‌ڵین : ئێمه‌یش قوربانی
گه‌نده‌ڵیه‌ه‌کانی یه‌کێتی و پارتین . له‌م پروپاگه‌نده‌یه‌دا دیاره به‌شێک له
خه‌ڵک ئه‌م ته‌سلیم بوونه‌وه‌ی ئه‌مانی قه‌بوڵ کردووه تا ئه‌و کاته‌ی ئه‌مانیش
تاقی بکه‌نه‌وه بزانن چه‌نده راست ئه‌که‌ن که ده‌ڵێن بۆ خه‌لکی کار ده‌که‌ین .
به‌ڵام بزووتنه‌وه‌که هه‌ر له جێ ی خۆیه‌تی و له‌وانه‌یه که‌مێ کز ببێ له‌م
ده‌وره‌یه‌دا به هۆی خۆش باوه‌ری و خۆش
خه‌یاڵی به‌شێکی ئه‌م بزووتنه‌وه‌یه به پروپاگه‌نده‌کانی گۆڕان و چاک سازی یا به
هۆی هه‌ڕه‌شه‌کانی یه‌کێتی و پارتی بۆ بڕینی بایعی مووچه و کرێ یا به هۆی پێدانی
بڕێک پاره بۆ ئه‌وه‌ی ده‌نگیان پێ بده‌ن . له‌گه‌ل ئه‌وه‌شدا ئه‌م بزووتنه‌وه‌یه
له پاش تێپه‌راندنی ئه‌م ده‌وره‌یه به‌ڕێ ده‌که‌وێته‌وه و ده‌بێته‌وه
به بزووتنه‌وه‌یه‌کی کۆمه‌ڵایه‌تی
به‌رفراونترو چه‌پ ترو رادیکاڵ تر ده‌بێته‌وه ،وه خواستی ئازادی و یه‌کسانی و
خواستی جیا بونه‌وه‌ی کوردستان پێکهینانی
ده‌وڵه‌تی سه‌ر به‌خۆ هه‌ر له خواسته سه‌ره‌کیه‌کانی ئه‌م بزووتنه‌وه‌یه ده‌بن .
خه‌ڵکی کوردستان ئه‌وه ده‌زانن که به هۆی هه‌ڵبژرادنی ئه‌مجاره‌ش وه‌ک دوو
جاره‌که‌ی پێشوو تر ژیان و گوزه‌رانیان و بێ به‌شیان له مافه ئینسانیه‌کانیان
گوڕانی به سه‌ردا نایه‌ت . ئه‌وه‌ی که ده‌ڵێ : ده‌توانین بیگۆڕین سه‌ر به هه‌مان
خانه‌واده‌که‌ی پارتی و یه‌کێتین و سه‌ر
به ناسیونالیزمی کوردن وه خۆیان به‌شێک بوون له به‌ڕێوه‌به‌رانی ئه‌نجامدانی
ئه‌م بێ به‌شیانه‌ی خه‌ڵکیدا هه‌ر له نه‌و‌شیروانه‌وه بگره تا چوار حیزبه‌که و
تا ئه‌وانه‌ی خۆیان به لیستی چه‌پ ناساندووه تا ئیسلامیه‌کان
. هه‌موو ئه‌مانه که‌م تا زۆر له گه‌ڵ
یه‌کێتی و پارتیدا ده‌ستی یه‌کیان
گووشیوه و سوپاسنامه‌یان ئاراسته‌ی ده‌سه‌ڵات کردووه ده‌ست خۆشانه‌یان له هه‌موو
هه‌نگاوێکی دژی خه‌ڵکی کردووه ، مه‌گه‌ر ته‌نها جاروبار گله‌یه‌کی برایانه‌یان
کردبێ ئه‌ویش به پێدانی برێک پاره پێیان بێ ده‌نگیان کردوون . کاتێ خه‌لک بۆ
داواکانیان ده‌هاتنه سه‌ر جاده‌کان له سه‌رجه‌م شاره‌کانی کوردستان له لایه‌ن
ئاسایش و میلیشیاکانی ده‌سه‌لات ده‌درانه به‌ر ده‌ست رێژی گولله ئه‌م گوڕان خوازو
چاکسازیخوزانه‌ی ئه‌مڕۆ له کوێ بوون ، کاتێ ده‌سه‌ڵات بریاریدا نابێ شوراکان که
نوێنه‌ری راسته‌قینه‌ی به‌رژوه‌ندیه‌کانی خه‌لک بوون ، هه‌بن و دواتر
هه‌ڵسوراوه‌کانی ئه‌م شورایانه و هه‌ڵسوراوانی یه‌کێتی بیکاران
و رێکخراوه سه‌ربه‌خۆیه کرێکاریه‌کان و ژنان ده‌سگیر ده‌کران و موڵه‌تی
کارکردنیان پێ نه ئه‌درا، یا کاتێ نه‌زیر عمر و کادره‌کانی حیزبه‌کانی تر له
بادینان تیرۆر کران رابه‌رانێکی وه‌ک به‌کر عه‌لی نوێنه‌ری دڵسۆزو خۆشه‌ویستی
ئاواره‌کانی که‌رکوک و شاپورو قابیل له رابه‌رانی ئاواره‌کانی که‌رکوک و 5
کۆمۆنیست تیرۆر کران یا چه‌ندین که‌سی ڕۆژنامه نوس و ئازادیخواز و کادرانی
حیزبه‌کانی تر تیرۆر کران ، یا
ماڵ به ماڵ ده‌گه‌ڕان به شوێن کۆمۆنیسته‌کاندا بۆ ئه‌وه‌ی ده‌سگیریان
بکه‌ن ئه‌شکنجه‌یان بکه‌ن ..هتد ئه‌مانه له کوێ بوون ؟ بۆچی نوزه‌یه‌کیان نه‌بوو
؟ ئێستا وه‌ڵامی ئه‌مه رۆشنه
چونکه ئه‌مانه خۆیان به‌شێک بوون له ده‌سه‌ڵات و هاوکاری ده‌سه‌ڵات بوون . وه
ئه‌مڕۆش ته‌نانه‌ت ئاماده نین بچوکترین ره‌خنه له خۆشیان بگرن له‌م باره‌وه .
دیاره من ناڵێم گه‌ڕانه‌وه بۆ باوه‌شی خه‌لکی ئیمکانی نیه و ئه‌وانه‌ی
دوێنێ له
له ده‌سه‌ڵاتدا هاوبه‌ش بوون پێکه‌وه کاریان له دژی خه‌لکی ده‌کرد ، ئیتر
ئه‌مرۆ ناتوانن خۆیان ته‌سلیمی به‌ره‌ی خه‌ڵکی بکه‌نه‌وه ،
نا به پێچه‌وانه‌وه ده‌بێ خه‌لک له
ئامێزیان بگرێ ئه‌گه‌ر راست بکه‌ن ، به‌ڵام ئایا ئه‌مانه به راستیانه که ده‌ڵین
ئێمه سه‌ر به‌م بزووتنه‌وه جه‌ماوه‌ریه‌ی خه‌ڵکی کورستانین تا خه‌لک باوه‌شیان بۆ
بکاته‌وه ؟ ئایا ئه‌مانه به رووکه‌شی
نه‌هاتوونه‌ته پێشه‌وه ؟هه‌رکه‌س چاو له پلاتفۆرم و به‌رنامه‌کانی ئه‌مانه بکا
و چاو له پرو پاگه‌نده‌کانیان بکا
ده‌بینێ به ڕواڵه‌ت جۆرێکن له
ناوه‌رۆکیشدا جۆرێکی ترن ، له
رووکه‌شدا مژده‌ی گوڕان ده‌ه‌ن له ناورۆکیشدا به درۆی ده‌خه‌نه‌وه
ئه‌مانه نه لایه‌نگری ئه‌وه‌ن چۆن کێشه ئابوریه‌کانی خه‌ڵک و چۆن کێشه‌ی
ژنان ، چۆن کێشه‌ی چاره‌نوسی خه‌لکی کورستان چاره‌سه‌ر ده‌که‌ن ؟
ئه‌مانه
نه لایه‌نگری ئازادی سیاسی و رێکخراو بون
و کۆبونه‌وه‌و مانگرتن و خۆپیشاندانی بێ قه‌یدو شه‌رتن ، نه لایه‌نگری ئه‌وه‌ن دین
له ده‌وڵه‌ت و په‌روه‌رده و فێر کردن جیا بێ ،
نه لایه‌نگری ئه‌وه‌ن لانی که‌می کرێی کرێکاران له ڕێگای نوێنه‌ری
راسته‌قینه‌ی کرێكاران دیاری بکرێ ، له‌م
بارانه‌وه هیچ جیاوازیه‌کیان له گه‌ڵ پارتی و یه‌کێتیدا نیه
.نه لیستی کورستانی نه لیستی گۆران نه‌لیستی چوار حیزبه‌که و نه‌لیستی
به ناو چه‌پ ..هتد وه‌لامیان نیه بۆ ئه‌و کێشانه . زۆرێک له خه‌ڵکی کورستان
وه‌ڵامی رۆشنیان هه‌یه له باره‌وه ، وه ده‌زانن هیچکام له‌و لیستانه لایه‌نگری
گۆران نین ، هه‌مانجۆر ده‌سه‌ڵاتیش دێته
ئاراوه هه‌ر بۆیه خه‌ڵکی کورستان ئه‌م هه‌ڵبژرادنه‌ی ئه‌م جاره‌ش وه‌ک دوو
جاره‌که‌ی پێشوو هه‌ر به گاڵته جاری
ده‌بیننه‌وه و پێان وایه ئه‌مه بۆ
جێگیر کردنه‌وه‌ی ده‌سه‌ڵاتی ناسیۆنالیستی کورده ئیتر گرنگ نیه ئه‌م ده‌سه‌ڵاته
ره‌نگ و به‌رگه‌که‌ی هه‌ر جۆرێک بێ ، وه
ده‌ڵێن ئه‌مه هه‌لبژاردنی ئێمه نیه ناچینه ده‌نگدانه‌وه ،
هیچ کام له‌م لیسته ره‌نگاو ره‌نگانه‌ی که ئه‌مرۆ شه‌ری ده‌سه‌ڵات ده‌که‌ن
و یه‌کتری به‌ر چه‌قۆ ده‌ه‌ده‌ن و لافیته‌و پۆسته‌ری یه‌کتر ده‌ده‌رێنن و ته‌قه
له ئۆفیسی یه‌کتر ده‌که‌ن و یا نهێنی یه‌کتر ئاشکرا ده‌که‌ن و په‌رده له سه‌ر
دزی و تاوانی یه‌کتر هه‌ڵده‌ده‌نه‌وه ، نوێنه‌ری به‌رژوه‌ندیه‌کانی خه‌ڵکی کورستان
نین ، ئه‌م په‌رله‌مانه‌ش په‌رله‌مانێکی کارتۆنیه و ئه‌م هه‌ڵبژاردنه‌ش گاڵته
جاریه و ته‌نها ئامانجی ئه‌وه‌یه که بزووتنه‌وه‌ی ناره‌زایه‌تی خه‌لک بۆ خواسته
به‌ر هه‌قه‌کانیان خامۆش بکرێ و بۆ ده‌وره‌یه‌ک ناسیونالیزمی
کورد خۆی ئاپده‌یت بکاته‌وه و شه‌رعیه‌ت به ده‌سه‌لاته نا عه‌دلانه‌‌که‌ی
بداته‌وه بۆیه ئه‌م هه‌لبژاردنه
هه‌لبژاردنی ئێمه‌ی خه‌لکی کوردستان نیه به‌لکو هه‌لبژاردنی بۆرژوازی کورده شه‌ری
باڵه‌کانی ئه‌م چینه‌یه له پێناو ده‌سه‌ڵاتدا .
14 ته‌موز 2009